أوكازيون الثوره من عجايب الزمن وربنا negm3LgeL.yoo7.com

[ندعوك للتسجيل في المنتدى أو التعريف بنفسك لمعاينة هذا الرابط]

وكازيون الثورة الاول 400 الف ج خاصة متصححة عن دم الشهيد اللى اتقتل خطأ و بنرفع السعر ل 550 الف ج لدم الشهيد اللى مات بالعمد ..وبيع يا مواطن ..فرصةعظيمة تحت رعاية السلفيين .. حيث عرض الشيخ عبد المنعم الشحات المتحدث الرسمى للسلفيين بعرض يطالب فيه اسر الشهداء انهم يقبلوا الدية بما يوازى 100 ناقة عن شهدائهم و ان العرض ده سارى لفترة محدودة بضمان الداخلية ووساطة السلفيين بس على الاسر تنجز و تخلص !!!! ..فى الوقت اللى رفضوا فيه قبل كده فكرة الدية للشاب السلفى سيد بلال الذى القى عليه القبض فى احداث تفجير القديسين و اللى لقى مصرعه نتيجة التعذيب بمقر مباحث الدولة .. ما هو اصله دمه المسلم اصلى لكن دم الشهداء صينى ..!! حاجة تنقط ..!! و الصفقة دى يتبناها السلفيين لاجل عيون الداخلية علشان يخلوها جميل يكسروا بيها عينهم علشان يوسعوا لهم الطريق لانتخابات المحليات الملعب اللى اعلن السلفيين انهم حيلعبوا فيه طالما الاخوان بيلعبوا فى البرلمان و الرئاسة و هم عاوزين يلعبوا برضه و أرض المحليات جاهزة للعب على 1750 مجلس محلى و حسب قولهم انهم حيلعبوا فى المضمون لان المحليات انتخاباتها سهلة و حتتظبط .. بالمناسبة نجحوا فعلا فى اقناع 9 اسر من الشهداء بقبول 100 الف جنيه دية ( يعنى كمان بيفاصلوا لصالح الداخلية و اهو كله جمايل ) فى اتهام ظباط الداخلية الغلابة فى قتل اولادهم خطأ علشان سن نملة الدبانة بتاعة البندقية كانت بتنقح و مكسورة و الضباط ما عرفوش يعالجوها من التسويس فخرجت الرصاصة غلط فى الشهيد اللى برضه الحق عليه انه وقف قدامها !!!!!!!!!!!! و سمعنى سلام الموت علينا حق
اوكازيون الثورة التانى .. الحق اشترى كرسى البرلمان بسعر زمان .. بعد دراسة و تانى خرج مرشد الاخوان د. بديع ليعلن تعطف و تفضل الاخوان بالمشاركة فى الجمعة 8 يوليو المسماة بالثورة اولا بعد ما قال انهم مش حيشتركوا بس رجع فى كلامه و لكن بشروط ان ما فيش مواطن يهتف بالدستور اولا لان ده عيب و كخ و ضد كلام الرجالة اللى اتفقوا عليه بالاستفتاء و اللى حيرفع سعر كرسى البرلمان بدون داعى و هم مش ناقصيين وجع دماغ .. و حدد وقت المشاركة من الصبح للساعة 5مساء .. كفاية علينا كده .. حننهب .. و برضه يبقوا جاملوا الشعب و اسر الشهداء و قاموا بالواجب و ما حدش يلسن عليهم و يقول انهم بتوع نفسهم .. بس اللى حيهرتل و يقول دستور اولا يبقى وقعته هباب .. حيفصلوه على طول و يرموه بره الجماعة و بعدين الفصل بالنسبة لهم قطع صوابع .. ما هو الدكتور بديع قال ان فصل الدكتور ابو الفتوح من الجماعة عمل زى قطع صباعه .. يا حرام .. حاجة تصعب على الواحد اوى !! ..بس مش مهم يتقطع صباع لسه فيه تسع صوابع فى ايد الاخوان تعرف تلعب طبعا كويس اوى طالما الدستور حيترحل و الانتخابات جاية غصب عن عين التخين و اللى حيتبنى شعار الدستور اولا صهيونى و عميل امريكانى و فلول نظام و شيطان انس و الباقى انتم عارفينه .. و اللى حيقول دستور اولا عدو مش حبيب الاخوان و مش حيسيبوه حتى لو كان المجلس العسكرى !!! حتى لو ارادة شعب اتعدلت بعد الاستفتاء !! هو الاستفتاء قال ايه ؟!! مش نعم .. يبقى كله هس و ما يفتحش بقه و سيبونا نشتغل بقة و نلحق الموسم قبل ما يخلص !!!.. مش مهم الشهيد اللى انداس دمه علشان وطن جديد و دستور جديد .. هو ينعم بالجنة و الاخوان ينعموا بالبرلمان و كده مرضية أوى .. يا بلاش .. هكذا تدار الاوطان بطعم السلفيين و الاخوان .. بلا قانون و بلا دستور بلا هم .. مشيها دية و مشيها تقسيمة ودى و مشيها رؤية ديكتاتورية و مشيها ضرب تحت الحزام و مشيها تلون و مشيها قطع ودان و صوابع ومشيها تجمل .. المهم كرسى البرلمان سعره ما يزيدش .. طبعا تمن الكرسى حيعلى لو الاحزاب اياها الوحشة بتاعة الليرباليين و السياسين الكخى دول خدت فرصتها.. ما اصل الطلب حيزيد فى السوق و المنافسة حتترفع و ده حيخسر معاهم .. بس برضه هم عاملين حسابهم بالمبدأ الاقتصادى كل نفسك بنفسك .. اخوان يلعبوا على البرلمان و الرئاسة و سلفيين و جهاديين يلعبوا على المحليات و بعدين ييجى مدرب ايرانى يعمل منتخب يلاعب بيه العالم ..
و اه يا حبيبتى لما تتشد جلابيتك ..
تخرجى بره بيتك .. يتخرس بوقك
يندفن بين انتهازية و مهلباتية صيتك
تنشق جدرانك و تتعرى .. يورثوا فيكى و انت عايشة .. قمحك يبقى شوكك
يجثموا بالظلم على صدرك ..يكتموا نفسك و يخلوا شكوتك طوقك
و مين حيبل لسانك بمية نيلك بعد ما نشف .. بعد ما باعوا دم شهيدك فى سوقك
و مين حيرفع نسرك و علمك فى السما يطير .. و مين حيرجع لنا من تانى صوتك

[ندعوك للتسجيل في المنتدى أو التعريف بنفسك لمعاينة هذا الرابط]